إنتي جاية هنا اشتغلي ايه؟

المقالة دي كتبتها في شهر 7 لكن الظروف لما جيت انشرها ماسمحتش, وفضلت تتأجل عشان كل شوية يجد جديد, بس دلوقتي لازم انشرها..

سؤال محيرني: هي الثورة قامت عشان نقعد نلطم ونولول على ما فات؟؟؟

ولا الثورة قامت عشان تصحيح الاوضاع؟

خلونا نبص على ثورة قامت قبل كده طيب, يعني مثلا ثورة 23 يوليو ولو إني مبحبهاش, قامت عشان أهداف معينة, طبعا قامت كمان عشان فساد ميتسكتش عليه في الجيش  وارواح راحت هدر في حرب 48 بس مش عشان كده بس, كان في بعد كده أهداف ظهرت بعد نجاح الانقلاب واضحة وصريحة, عدالة اجتماعية انهاء الإقطاع الخ..  وحركات عرابي وسعد زغلول ومصطفى كامل قامت عشان أسباب مباشرة زي حادثة دنشواي والمحاكم الاجنبية ولكن كان ليها هدف واضح هو انهاء الاحتلال البريطاني.. وزيها زي ثورات تانية كتير في العالم كانت ليها أهداف واضحة, واغلبها كان المحرك الرئيسي ليها هم الشباب الصغير في السن اللي معندوش خبرة... أُمّال ايه اللي حصلنا هنا في مصر في ثورة 25 يناير؟ ليه معندناش أهداف محددة نقدر نحطلها خطة ونعرف نحاسب نفسنا احنا ماشيين صح ولا غلط؟

قبل ما أجاوب, لازم أقول إن ده مش معناه إن احنا نقول المسامح كريم وعفا الله عن ما سلف, مش بس لإن ده حق شعب بحاله وعشان أي حد يوصل للسلطة بعد كده يفكر ميت مرة قبل ما يظلم, وعشان فاق الظالمون المدى.. تخيلوا معايا كده كان ينفع حد يقول لمصطفى كامل واللي معاه خلاص يا عم بلاش نحاكم الظباط الانجليز اللي قتلوا وعذبوا الناس في حادثة دنشواي؟

نرجع تاني بقى, ليه الحساب مابيتحاسبش وليه مفيش أهداف للثورة عارفين ننفذها؟

عشان نعرف نجاوب عالاسئلة دي لازم يبقى في توزيع للادوار.. وانا مش حابقى زي اللي مسكوا العصاية من النص وبيقولوا أنا رأيي المتواضع وانا مقدرش أحكم عشان أنا مش في مكان المسئول الفلاني وبيحسسوا عالكلام.. أنا صحيح زي زيهم مش شايف كل مسئول بيواجه ايه,لكن أنا للأسف أؤمن بالتخصص,  يعني كل واحد يقول حيعمل ايه بالضبط وينفذه, يعني إنتي جاية هنا اشتغلي إيييييههههه؟ سواقة؟ تشتغلي سواقة, لو جاي تدور على الزلعة يبقى عمرك ماحتسوق مشوار واحد, سواقة يعني سواقة, سواقة وبس!

وعشان احنا كنا في وقت الفساد مستشري فيه في كل حتة من أول عسكري المرور لحد اللي باع مصر برخص التراب ومرورا بموظف الحي واللي بيجدد الرخص وبتاع التموين وحتى السايس والشحات اللي مظبطين مع آمين الشرطة عشان يسيبهم يسرحوا في المنطقة بتاعته.. ونظام ظبتني عشان اظبطك وابجني تجدني ومفيش كباية شاي يا بيه اللي كنا ماشيين به في كل حاجة.. فـمتستغربوش لما توزيع الادوار يبقى غير تقليدي في بعض أوقات!

أولا: الثوار, بما إن الاعلام مضروب بالنار والقضاء اللي كان ورقة التوت اللي ساترين بيها نفسنا طلع فيه ربع ضارب (هو مين اللي كان مشرف على انتخابات 2010 المجيدة؟ ولو حد له قضايا في المحاكم الابتدائية أكيد فاهم الدنيا ماشية هناك إزاي في أغلب الأوقات, ده من غير مانجيب في سيرة النيابة اللي بتحقق وبتحضر القضايا اللي بتتعرض قدام القضاء عشان الدنيا ماتقلبش كحلي قوي) فـالثوار هم ثرمومتر الرقابة, يعني من غير ما نفتي كده هم الأمل الوحيد إن محدش يكسل, محدش يعمل عبيط ويطنش أو ماحدش يستهبل أصلا! دول بقى, اللي هم الثوار, لما يهدوا, اعرف إن خلاص, الدنيا كده ماشية في الاتجاه السليم (شايفك ياللي قاعد ورا في آخر صف وبتقول إن دول مابيهدوش أبدا وعمرهم ماحيهدوا, شايفك وأحب افكرك بيوم 11 فبراير لما كله رجع بيته, بس نزل تاني عشان الثرمومتر كان على اخره, كان حيفرقع!)

ثانيا: المجلس العسكري, نيجي بقى للمجلس العسكري, ونسأل... إنتي جاية هنا اشتغلي إيييييييههه؟ حامي الثورة؟ لحد انتقال السلطة لحكم مدني؟ الله يعينكم واللهِ... بس ايه اللي مصبركم على كده؟ ليه وافقتم تاخدوا الدور المهبب ده في وسط الظروف الكحلي اللي البلد فيها دي؟ عشان الوطنية طبعا! عشان الدور الوطني اللي الجيش دايما بيعمله, أنا مش بتتريق في الجملة دي بالذات عشان ما أتفهمش غلط, أيوه عشان الوطنية وعشان الدور الوطني اللي الجيش دايما بيعمله.. الجيش تاريخه مليان بالبطولة والتضحيات والشهداء اللي عددهم يفوق ميت مرة عدد شهداء ثورة 25 يناير.. بصوا هنا, واجب التنبيه, الجيش حاجة, والمجلس العسكري حاجة تانية, آه واللهِ! بنسبة للجيش, الجيش اجاين, يعني تاني, طول عمره وطني, هو كده, طبيعته كده, في ناس من كل الاطياف, كل فصائل الشعب يعني (حلوة فصائل الشعب دي, شكلي بقيت أعرف أتكلم مجعلص ولا ايه!), جيش نظامي, مبني على الظبط والربط, مفيهوش معلش, مفيهوش أصل, مفيهوش غير إنتي جاية هنا اشتغلي اييييهههه؟ سواقة؟ يبقى سواقة, مفيش سواقة وربع, سواقة إلا ربع, سواقة بالتقسيط, سواقة يعني سواقة.. اللي عاوز يتأكد, شوف كده أي مشروع الجيش هو اللي عمله وقارنه بـأي مشروع تاني, خد حاجة بسيطة, بلاش استاد كورة, خد كوبري, شوف الكوبري اللي قبل الدائري في شارع الثورة في مصر الجديدة وقارنه بأي كوبري تاني عامله مثلا المقاولون العرب, ده في حتة جديدة في الدائري ناحية 6 أكتوبر مابقلهاش سنة, والمفصلات بتاعت الكوبري باظت, المهم..ده يا سيدي الجيش, وطني, مضحي, ملتزم, محترم, قوي... نيجي بقى للمجلس العسكري, ومن غير ماأخُش في نيته... المجلس العسكري ده فيه القادة بتاعت الجيش, يعني المخ مش العضلات, يعني اللي بيتفق على صفقات السلاح, يعني اللي بيخططوا لاستراتيجيات الحرب, يعني لازم يبقوا محنكين اذكياء ودماغ, وكمان بما إننا في حكم عسكري من ساعة ثورة 23 يوليو هم على صلة قوية بالقيادة السياسية اللي هي عسكرية أصلا, ده غير إن الرئيس المخلوع كان هو القائد الأعلى للقوات المسلحة, يعني كان رئيسهم المباشر, يأمر فيطاع, احنا في جيش هه!؟

يبقى احنا بنقول إيه, في جيش محترم وطني وحامي الثورة, وفي مجلس عسكري فيه القادة بتاعت الجيش, مسئولين عن الجيش وعن البلد كمان دلوقتي, كانوا شغالين مع الرئيس المخلوع ودلوقتي مسئولين عن الثورة لان الجيش بتاعهم هو الحامي الوطني المحترم..

طيب, يعني ايه بقى حامي الثورة؟؟؟ نقدر نوزع الادوار دلوقتي بقى, حامي الثورة, يعني بيحافظ عليها, وهي الثورة فيها ايه غير شوية مطالب؟؟؟ يبقى الجيش لازم يحافظ على المطالب دي, ويتأكد إنها بتتنفذ, ويطمئن إن اللي قاموا بالثورة دول مطالبهم بتتعمل, وخصوصا إنه مسئول عن البلاد يبقى لازم كمان يقنع الناس ويهديهم عشان البلد تسلم.. احنا مرحناش لقحنا جتتنا عليه ولا كبسنا على نفسه, الجيش طلع في بيان رسمي قال لك أنا مسئول وأنا حامي الثورة, طلع والثورة لسة في ريعان شبابها يادوبك مكملتش شهر وقبل الثوار مايطمئنوا على ثورتهم واهدافهم ومطالبهم وقال لك ماتقلقوش يا ولاد أنا لها, ماينفعش بقى يعمل نفسه زي أي رئيس منتخب للبلاد وله توجهات معينة وأصل أنا أفهم أكتر منكم وأصل في اعتبارات تانية والذي منه, كان الكلام ده من الأول.. طب وايه كمان؟ الجيش ماينفعش ييجي يقعد على طول, لإن كده يبقى انقلاب مش حامي الثورة, يبقى كمان الجيش لازم يلتزم بخطة لتسليم الحكم لحكومة مدنية في خلال فترة مؤقتة.. يبقى الجيش مسئول عن تنفيذ مطالب الثورة, في فترة معينة بعدها يسلم السلطة لسلطة مدنية..

ثالثا: الحكومة, دول زيهم زي أي حكومة في أي بلد محترمة, عبد المأمور يا بيه, بيخططوا للأهداف, وبينفذوا الخطة اللي القيادة السياسية وافقت عليها, اللي هي دلوقتي المجلس العسكري, اللي هو مسئول عن الثورة, وتنفيذ مطالبها..

كده خلصنا, بس في حاجة تانية يجب ذكرها دلوقتي, الداخلية: عشان كل دول يقدروا ينفذوا الحاجات دي كلها, لازم يبقى في جو من الأمان, وأهم من كده لازم يبقى في رقابة, يبقى في دور مهم قوي على الداخلية من دون كل الوزارات التانية لتهيئة المناخ المطلوب للخروج بالبلد من عنق الزجاجة (باين عليَّ بقيت ضليع في المجعلص فعلا!) مفيش هنا بقى أصل الوحشين بتوع الثورة معاهم مولوتوف, ولا بيحدفونا بالطوب, ولا أصل عندي واوا, الداخلية بتاعتنا دي  المفروض هي اللي واجهت الإرهاب في التسعينات ومافيا المخدرات في الثمانينات وشيبت الجماعات الاسلامية والمعارضة في القرن الواحد وعشرين, ملهاش في المياصة يعني.. لازم تبقى قدها وقدود..

نرجع بقى دلوقتي لسؤالنا, ليه مفيش أهداف واضحة وخطة زمنية محددة لتنفيذ كل مطالب الثورة, الثوار وعملوا اللي عليهم, والجيش واستلم منهم, وكلف الحكومة بالتنفيذ, هل الحكومة مش قدها؟ يبقى الجيش مسئول قدام المصريين إنه يجيب حكومة تعرف, ماهو التزام بقى! هل الجيش بيأمر الحكومة تعمل حاجة تانية؟ تعمل عبيطة يمكن لحد مايسلم السلطة؟ لأ ماينفعش, أكيد لأ, ده الجيش الوطني المضحي المحترم, بس هو المجلس ولا الجيش؟ المجلس؟ تفتكر بيعملوا علينا محنكين؟ تفتكر بيرتبوا ورقهم عشان الشغل اللي كان مع المخلوع؟ تفتكر مش قادرين يقلبوا عليه عشان هو عسكري واحنا مدنيين؟ لأ لأ لأ, أكيد لأ, أنا متأكد, المجلس يا جماعة وثقة الشعب و كمان الجيش معاه التزام قدام العالم كله إنه يكمل أنضف وارقى ثورة في تاريخ البشرية, عشان تكمل سلمية سلمية وتوصل بنجاح, وبعدين ده التاريخ حيكتب ويقول المجلس نجح ولا منجاحشي, أنا واثق إن المجلس, المسئول عن حماية الثورة, حينفذ إن شاء الله..

قبل ماأنسى, في دور مهم قوي علينا, أيوه احنا, اللي هو الشعب, لازم نثق وندعم كل الناس اللي مسئولة عن التنضيف والتطوير, من غير تشكيك ومهاجمة في كل حاجة, الجيش حينفذ, ولو منفذش ثرمومتر الثوار مش حيسيبوه, والحكومة مش حتتقاعس, لإن المجلس واقفلها بالمرصاد, هي الديناميكيات دي هي اللي بتسيطر عالموقف وبتكمله, أي حد يسأل هم اللي في التحرير دول بيعملوا ايه؟ نقوله دول ترمومتر مالكش دعوة, المجلس معملش محكمة لييههه؟ أكيد حيعمل ولو اتاخر أو نسي الثوار حيفكروه, عاوز تفكره إنت كمان أهلا بيك مع الثوار في الميدان.. مش عيب, ماهو الميدان مش بكارنيه, حد تاني حيسأل البلد واقفة ليه والبلطجية دايرين ليه, عنده الداخلية يسأل فيها وإن شاء الله هي حتسأل فيه.. الاقتصاد حيرجع امتى؟ ماهو ما أخدش شنطه وهاجر على كندا, هو موجود والحكومة شغالة عليه وعلى إنه يبقى أحسن من قبل كده كمان إن شاء الله.. واللي عاوز يسأل على العجلة والاستقرار والوضع والكلام الحمصي ده يفتح التلفزيون وحيلاقي خمسميت برنامج توك شو حيطمنوه ويزهقوه ويركبوه عجل زي ماهو عاوز..

كل واحد على شغله بقى مش عاوز دوشة!